- 777 -

1453. Aug. 25. Breslau.

Herzog Johann zum Brieg an die Handwerkmeister aller liegnitzer Zechen.

Wir Johannes von gotez gnaden in Slesien herczug zum Brige vnd ein rechter erbe zu Legnicz embittin vnsern besundern getrawn, allen eldisten, geswornen handtwergmeystern allir czechin der gemeye, arm vnd reich zu Legnitz vnnser gunst. Libin getrawen, wol ist is offinbar, das wir vnsern gnedigsten herren koning Lasslaw personlich besucht haben, als von vnsir erbgerechtikeit wegin, dy wir haben zu dem slosse vnd stat Legnicz vnd zu euch allin vnd sein von seinen konniglichen gnadin gescheidin, das seine gnade vns ein recht sulde bestalt habin den montag noch Jacobi nestuorgangin, wy sich das kein eyme fursten in der Slezie zutun geborit, noch deme das dy hochgebornen fursten herczug Ludwig von Beyern vnd marggreue Albrecht gemacht vnd betedinget hatten, dorobir sy seinen konniglichen gnaden einen briff gegeben habin vnd desgleichin auch vns vnd sottan recht sulde vns vngeferlichen bestalt wurden sein, das vns denne nicht mochte geen von seinen raten, als ir das wissit; donoch als denne herczog Otto der Eyciger vnd andir rate des konnigis kein Bresslow qwomen, do wart vns abir benvmpt ein recht zubestellin, wy sich das eyme furstin in der Slezie zu geborit, deme wir abir gehorsamlichen gefulgit haben vnd vnsir herren vnd frunde dorczu gemuhet, is kunde vns abir nicht gescheen, vnd sein also swerlichin rechtlos blebin, das wir denne euch clagin vnd iczlichin gutin man dirbarmen mag. Sind denne ir nicht hochir geholt habt denne vnserm recht vnschedlichin, so ermanen wir euch, das ir keigin vns aucht recht tun wolt vnd euch in andere wege nicht lossin leyten. Das wollin wir kein euch vnde ewern kindern nymmer vorgessin vnd wollit wissen, das wir dorvmb dy briue ansloen lossin, dorvmb das euch vnsir briue, dy wir euch sendin, seldin geantwort werden vnd begern ewere antwort. Gebin zu Bresslow. Am sonnabunde noch Bartholomey. Anno etc. LIII°.

O. d. St. L. No. 423. Papier mit aufgepresstem Siegel in rothem Wachs.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866